暑，熱也。港股納悶，散戶霍生覺得七、八月市況傾向滑落，現時係靠大戶托住先，「除咗滙控（00005），手上咩貨都無，七月真係要抖番下，我遲啲都會去美國旅行抖一抖。」
日日清貨瞓得安樂
「買股票邊有抖暑㗎？最多咪玩細少少。」散戶李生認為，雖然近日市況令人難以捉摸，但佢認為港股只得100億元成交時都有得玩，只要善用唔同嘅投資工具，依家五百幾億成交又點會無得玩？但佢繼續以「日日清貨，瞓得安樂」為原則。
大市唔上唔落，股友惟有轉戰新股。準備抖暑嘅霍生，好好彩咁抽中兩手（4,000股）霸王（01338），上星期五甫開市，以2.9元追多1萬股，最後係接近全日高位嘅3.15元沽晒貨，賺咗五千幾蚊。
8300萬抽霸王賺18萬
後來聽耀才證券總經理陳啟峰講，原來佢間證券行最大嘅霸王大飛，認購咗3,500萬股，即係要「動用」八千三百幾萬蚊，最終獲分29萬股，以當日中間價3蚊沽貨計，賺接近十八萬蚊（未計其他成本）。
今期截至上周末下午六時的《東方產經》網上民調結果發現，29%網民認為港股今季會繼續發力向上，估大市後勁不繼嘅就有48%，23%人認為股市橫行居多。
翻查過去五年資料，恒指喺暑假（七至八月份）平均上升4.6%，A股比較反覆，但一升就井噴咁，所以平均升幅有5.4%。
○四年泰國布吉經歷咗一場海嘯浩劫，Baby上個月底去布吉玩幾日，見到周圍竪立嘅海嘯逃生路線（Tsunami Evacuation Route）指示牌，喺呢場金融海嘯下，感覺依舊強烈。
逃生路線早已淡忘
巨浪翻騰過後，幸存者難以忘記當日嘅悲痛，但喺每一個角落都清楚指示逃生路線，萬一海嘯再襲，也盡可能將傷亡減到最低。舊年九月雷曼成為歷史，絕大部分投資者遭無情嘅金融海嘯洗劫，但恒指由今年三月11,000點水平，一度升至接近19,000點，足足反彈成8,000點，試問呢幾個月有幾多投資者認真諗過「逃生路線」?
A股好牛，有內地網友察覺到滬深A股流通市值已達9.3萬億元人仔，超過○七年十月十六日滬綜指升抵歷史高位6,124點時，兩地總流通市值嘅8.8萬億元，但點解滬綜指依家只得3,088點，只及當年一半？佢就話，原因在於呢段時間股票供應增加，包括大量「大小非」轉成流通股、新股上市、上市公司配股等，但整體股價水平遠不復當年，所以流通市值大大跑先於指數。
港股上周五市值14萬億元，而恒指○七年十月三十日高見31,958點時，市值達23萬億元。舊年七月十一日，油價升至巔峰147.27美元，依家喺65美元水平浮沉。都俱往矣！
唔少遊客去泰國騎大象，Baby從來無騎過，因為人類剝削緊佢哋做動物嘅尊嚴，有無恥之徒更竟然帶大象喺曼谷四圍行乞，有無搞錯?再睇電視見到草原上嘅野生大象，世界原來好靚。Heal the world, make it a better place！
（Baby）
若然有料想報畀Baby或有嘢問，可電郵money.biz@opg.com.hk