花旗失業率持續上升，年內或見雙位數，對估值並不便宜的花旗魚缸構成壓力，本地魚缸亦難獨善其身。至於祖國錢莊放寬信貸，在上半年大開水喉，部分資金流入祖國魚缸，祖國魚缸愈戰愈勇。不過，祖國銀監會上月靜雞雞成立專案小組，調查利用銀行貸款違規入巿問題。呢個缸湖傳聞暫未見祖國魚缸對此有太大反應，不過熱錢若流出，祖國魚缸患上「感冒」，本地魚缸亦當然亦無運行。

新股料繼續熱炒

不過，花旗魚缸在獨立日假期前插水，本地魚缸在上周五竟然成功扭轉早段跌勢，恒指倒升25點散場，可見本地魚缸跟花旗魚缸愈見背馳。古勝相信在熱錢繼續流入下，本地魚缸暫時未似會大屠殺，但畢竟恒指在上半年已累升近三成，七月及八月為傳統較淡靜的月份，芬佬放暑假，唔排除本地魚缸呢段時間進行整固，或出現較大幅度的調整。

上周五兩新丁登場，表現各有千秋，霸王（01338）跟秦發（00866）全日見缸邊友積極熱炒，皆因其他二三線股仔仲抖緊氣，鑊鏟友惟有向新丁埋手。霸王的IPO爆燈紀錄，或被本周登場的另一新丁琥珀能源（00090）打破，缸湖傳聞琥珀爆燈指數逾千倍，料跟其發行股數有限，IPO部分更只有發行股數一成，即一千萬股有關。琥珀晒士細細，在下預期本周五登場將熱炒，看官不妨拭目以待。

股仔熱情冷卻，但紅色分子繼續受捧，上周五紅色地主表現出色，相信升勢可持續。除咗紅色地主，能源股亦是投資者熱捧對象，當然以新能源股較有概念，不過傳統能源股亦有捧場客。北大人近年鼓勵居民利用天然氣取代燃煤，配合之前幾年推行的西氣東輸計劃，相信呢項國策將刺激祖國未來對天然氣的需求。

變身天然氣旗艦

近日有缸湖傳聞指中油香港（00135）將獲阿媽繼續注入天然氣項目，未來或成為中石油集團的天然氣旗艦公司，前景可以睇高一線。中油香港○八年純利33.19億元，增長69.05%，期內實現原油售價每桶78.26美元，雖然近日「油魔」唔多精神，但其股價卻未太受油價走勢影響，估計係市場憧憬集團短期將再獲阿媽注資「打補針」。據港交所（00388）資料顯示，中油香港阿媽在上月十二日，曾以每股平均價5.837元增持1,240萬股，持股量由57.15%升至58.01%。阿媽咁大手掃貨，睇嚟落實注資之期亦不遠矣！

古勝