交流意見氣氛良好

周文耀早前話並不認識李小加，咁今次兩人「歷史會面」，有冇擦出火花呢？聽聞兩人就港交所多方面交流意見，商談氣氛良好。周文耀之後仲介紹咗港交所各個部門主管畀佢認識，各人介紹自己同工作範疇。

有見過李小加嘅人都話佢個人幾親切，講普通話之餘，英文講得非常好。佢曾經講過，自己對港交所技術運作認識唔深，喺依家嘅「過冷河」期間會好好補習。前日見完港交所管理層後，佢會唔會對工作有新領會呢？

獲授科大榮譽院士

講番周文耀，尋日佢獲香港科技大學頒授大學榮譽院士，雖然佢戴帽已好多次，但今次佢都幾感動，因為嗰篇介紹佢嘅文章，寫得非常到肉及精彩。

周文耀話自己感到好榮幸，甚至有啲受之有愧，佢好多謝科大認同港交所係本港金融重要嘅部分，話港交所未來會更努力。佢致謝辭時特別提到要感謝太太及家人，長期以來明白佢工作繁忙，並且給予支持。周太聽到佢呢番說話，必定心都甜晒啦！

余絲韻