本文重點
隨着內地正式推出3G服務，一眾電訊設備股今年嚟嘅表現都唔錯，其中京信通信（02342）算係其中一家，公司股價由舊年嘅幾毫子一直升到近期嘅高位4.16元。有見股價表現愈來愈好，公司作出一項公布，話主席霍東齡尋日用收市價以場外轉讓方式，向多名董事及高管轉讓咗3,000萬股京信股份，交易完成後，霍主席持有嘅Prime Choice喺京信嘅持股量，就由43%降至39.8%，以尋日京信收市價4.02元計，霍主席呢次轉讓股份就套現咗1.2億元。
場外轉讓反應理想
據集團解釋話，霍主席希望員工可分享公司業務增長帶嚟嘅成果，而以場外方式轉讓，就可將行政成本同其他相關費用減到最低，仲可以提高股份流通性，公司方面仲話，獲邀參與呢次轉讓嘅員工反應幾理想。絲絲有啲唔明，點解公司唔直接送股畀班高層呢？即使唔送要轉讓，點解霍主席唔提供一個折扣呢？但班高層嘅反應卻又咁理想，唔通真係咁睇好公司前景？
余絲韻