本文重點
近日三家中資電訊公司公布數據，絲絲發現內地移動電話新增用戶增長好似慢咗，有分析員就認為係電訊商放慢宣傳手腳，待下半年有更多新３Ｇ手機出籠先至加大宣傳。
西藏偏遠地都收到
手機確係吸引客戶嘅其中一個重要元素，中電信（00728）董事長王曉初尋日專登同一眾手機商見面，希望佢哋多生產ＣＤＭＡ制式手機，仲話手機廠嘅３Ｇ春天已經到咗，皆因依家內地好多地方都已有３Ｇ網絡覆蓋，能否把握呢個春天就要睇手機商自己嘅造化喇。
王總又話早排去西藏睇吓公司喺當地嘅３Ｇ覆蓋，發覺喺西藏好多偏遠地方都有中電信３Ｇ嘅訊號，仲話自己喺西藏五日，所有文件審批都係用手機搞掂，簡直係身體力行！
講開中資電訊公司，中移（00941）成為新一年「胡潤中國品牌榜」冠軍，係連續三年蟬聯，但品牌價值就由去年嘅三千八百億人仔，跌到一千九百九十億人仔，至於中電信就以三百八十億元人仔排第六！
余絲韻