本文重點
電訊盈科（00008）私有化搞咗幾個月最後被推翻，可謂本港小股東維權活動嘅經典案例，電盈今日舉行股東周年大會，據聞會有好戲睇，邊個擔正主角？應該會係電盈小股東聯盟成員陳仲翔。佢話為咗要電盈管理層正視小股東權益，正考慮毛遂自薦做電盈嘅獨立非執董，大有對電盈董事局嚟個當頭棒喝之意！
明知不可為而為之
陳仲翔喺反對電盈私有化過程中一向表現積極，絲絲尋日同佢傾開，佢話由於董事委任係畀大股東牢牢控制，要自薦做獨董根本無勝算可言，但如果今日會上有呢個機會，他仍願意「明知不可為而為之」。
究其原因，係佢對絕大部分電盈獨立非執董嘅表現實在太過不滿，而自薦就係要公司上下正視問題所在！佢仲話，電盈小股東聯盟嘅多名成員已約定會穿着一款「非常有意思」的T恤出席股東會，叫絲絲記得留意喎！
佢就賣關子唔肯講件T恤有乜特別，絲絲就八到件T恤應該係白色，上面寫上「I love PCCW」，弦外之音大家心照喇！
余絲韻