26/06/2009

播放本新聞相關短片
 
股價號碼: 

絲絲講場:美慈善基金捐錢無手軟

金融海嘯令全世界損手,慈善基金自然亦不能幸免,有統計指去年美國慈善基金投資回報普遍插水,幅度更達到兩成六,是統計以來錄得嘅最差紀錄。不過蝕錢還蝕錢,投資損手並無打擊慈善基金嘅捐錢力度,好似貴為全球最大型慈善基金,以蓋茨兩夫婦命名嘅慈善基金去年就捐出35億美元,較前年嘅32億美元多近一成。

美規定年捐最少5%

根據喺早兩日發布嘅美國Commonfund調查顯示,受訪嘅290個私人及公共基金團體,去年平均捐出資產嘅5.8%,較前年嘅5.5%略高。由於聯邦政府規定慈善團體每年要捐出最少5%資產,但隨着資產價格急跌,去年底好多慈善團體已事先張揚話今年會大幅削減捐款。

蓋茨夫婦基金雖然唔喺今次調查之內,但去年其投資錄得負增長,跌幅達到兩成。不過呢個成立於一九九四年嘅基金,自成立起每年均會捐錢,基金早前表明話唔會削減今年嘅捐獻金額,卻明言唔好對今年投資回報有太大期望。

余絲韻

投資要精明 助你成為投資達人
詳情瀏覽on.cc《精明理財》