本文重點
許浩明（Herbert）由海域○七年出事到依家，唔經唔覺整整3年，喺今個月，許浩明三個字已經從海域訴訟嘅被告人名單中刪除，絲絲都打電話去恭喜佢。Herbert話重組間公司只用3年其實唔算耐，而最令佢感慨嘅係睇到人情冷暖，但佢已做到「憑良心做事、問心無愧」，更慶幸海域化工重生到今日嘅香港資源（02882）成績有目共睹。
三載經歷 見人情冷暖
Herbert由海域出事一直留守公司協助清盤人，喺商界實屬罕見，佢好感慨咁話係人生一大考驗，而患難方見真情，發現身邊咁多朋友，有兩成係真正朋友，有一成唔想佢好，餘下七成係食住爆穀等睇戲嘅人，好彩佢無衰畀人睇，依家港源有黃英豪做領導，仲有恒地（00012）主席李兆基父子做股東。
展望未來，佢話只要港源需要佢，佢願意繼續留喺公司幫手，按部就班完成收購金至尊，拓展大陸零售同上游生意，而且黃金商品目前炙手可熱，日後都有好多商機。另外，Herbert今年二月獲派451萬份港源認股證，佢話已經行使咗做港源正股，雖然股份唔多，但佢會長線持有。佢話日後會減少公職，專心做生意搵真銀。
余絲韻