日前做好的金融及地產股，尋日齊齊下挫，當中內銀股遭審計報告指存在違規問題的三大銀行股亦見沽壓。事實上，近日大市反覆上落，唔少股份都開始散散地，細價股尤甚，但慶幸的是，尾段買盤再見積極，似乎市場中，有一班人並非看得太淡。點都好啦，現階段只適宜跟炒消息股，見好即收。
講開消息，真係不得不提一下，已停牌達七個多月的國美電器（00493），雖然話就話有策略股東執手尾，但係根據港交所（00388）資料顯示，黃光裕仍手持35.55%股權，所以即使憧憬未來有外來資金逐步增持國美股權，又或者整盤生意得以易手，但黃先生手上的股權都未知點算，故認為前景仍未盡樂觀，短期追入亦唔太值博。
另外，尋日工信部及發改委發出通知，表示同意3G服務中的視像通話服務可實行市場調節價，講得白啲，即係營運商以後可自行調整視像通話的收費，消息對內地電訊商往後經營真可謂一大喜訊，值得慶祝。
（小尾）