張瑞敏搞企業已經30幾年，佢話面對金融海嘯最緊要「有得留低」，所以就一定要提高水平。例如家陣好多廠家只考慮過唔過到冬，而海爾就諗緊點樣「冬泳」，提升管理水準。

企管文化因地制宜

佢講起點樣發展適用於中國國情嘅管理時就話，經過「走出去」，佢發現中外嘅企業文化好唔同，好似喺美國開廠，將程序話咗畀工人聽，之後再按照當地嘅條件改動時，啲工人就好反感，會反問：「你哋前兩日話咁，今日又話係咁，到底點先叫啱？」所以唔可以朝令夕改。佢話呢種係「法」嘅概念，但係中國工人對呢個概念唔熟悉，所以如果你叫一個中國工人每日抹5次枱，但好可能今日抹5次，聽日就只抹3次。

不過講到底，佢認為最緊要創新，仲借咗禪宗句「凡牆都是門」──只要你敢創新，就算有道牆都可以通過去。講到創新，其實海爾有所大學，家陣到海爾大學接受學術交流嘅人員每月超過400人，對外培訓嘅學員數目已超過10萬人啦。

余絲韻