爭贏與奧委會合作

絲絲問安踏執行董事賴世賢，點解可以擊敗其他國際品牌體育公司好似Adidas、Nike同李寧（02331）等，佢話因為公司投放好多資源支持奧委會嘅賽事，又符合奧委會開出嘅條件，所以成功爭取到呢個項目。佢話日後有十一項國際賽事好似冬季奧運會、亞洲室內運動會等，都會見到中國國家代表隊穿着安踏運動裝進場及領獎。

絲絲記得李寧向來都贊助六項中國國家體育隊，喺舊年北京奧運會仲好突出，令好多人認識李寧品牌，點解今次爭輸咗？聽朋友講，話今次李寧都有入標，不過有見呢個項目嘅投資回報期唔理想，所以放棄，不過佢哋仍然會贊助國家代表隊嘅運動衫。

另外，賴世賢話安踏今年首季同店銷售有單位數增長，對第二季增長樂觀，而且公司第四季定單增兩成半，反映內地體育用品市場回暖。

余絲韻