本文重點
近期豬流感（H1N1甲型流感）肆虐全球，大家對衞生意識提高咗，維達（03331）為咗宣傳濕紙巾新產品，捐咗價值300萬元人民幣嘅濕紙巾畀醫院、學校及幼兒院。維達主席李朝旺話，健康生活應該由小朋友開始，所以佢哋捐咗濕紙巾畀幼兒院，絲絲覺得維達好醒目，一早培養小朋友認識佢哋嘅產品。
撞啱疫潮推新產品
李朝旺又話，公司今次推出高端嘅產品，呢個產品嘅毛利率可達40%，高過其他產品，今年下半年會加大力度去宣傳，第一步就係捐贈濕紙巾，之後喺各大超市分銷，亦會投資1,000萬元人民幣增加約一萬家形象店。另外，佢話呢類產品喺一年前已開始準備，啱啱近期有豬流感，所以趁勢推出，佢希望呢類產品喺3至4年後，佔集團收入10%，同時目標喺3年內市佔率可達15%。
余絲韻