熱錢無流走迹象，水向低流，估值較低，或者今年升幅唔大嘅中資股，依然教基金經理們食指大動。港交所（00388）的股權披露資料顯示，摩根大通在本月十八日，以平均價3.35元，買入316萬股駿威汽車（00203），及以平均價3.59元買入3,473萬股中國電信（00728），最新持股量分別增加至6.03%及8.1%，無獨有偶，兩隻股票今年升幅唔算大，分別升20.7%及15.3%，駿威比起股價翻一番的東汽（00489），仲係落後一大截。

所謂有人辭官歸故里，有人漏夜趕科場，可口可樂收購滙源果汁（01886）被商務部叫停，傳聞美國私募基金華平意興闌珊，退出主要股東名單，從股權披露荷蘭退休基金APG Group，申報買入9,877萬股，持股比重由零一躍升至6.7%，成為大股東以外最大持股股東，這近億股的交易，平均成本價係5.1元，相信股民可以作為日後參考。

內房股愈升愈有，被視為高槓桿高啤打值的基金愛股富力地產（02777），剛獲高盛及麥格理評級買入及跑贏大市，德意志申報在本月十六日，在市場增持280萬股，目前持有5,186萬股或者相當於H股發行比重的5.11%，翻查紀錄，德銀本月十一日曾經減持501萬股，五日後又補貨，到底係睇淡定睇好，確係無手影可捉。

戴子彪