世銀唱衰全球經濟，全球股市即時大玩插水，隔晚美股急插兩舊水收市，港股即時腳仔軟，昨日再失守萬八點。昨日雖然尾市略有反彈，不過啲股仔就唔多精神，古晨覺得炒股有勢唔怕狼，無勢就要嚴守止蝕。炒股仔最着重係個氣氛，近期大市已經麻麻地，加上啲股仔早前炒得咁狼，現時應該係小心嘅時候。
內地要靠內需去保八，外資紛紛睇好內需股，國美（00493）配股，一眾外資基金搶貨，多少反映市場看法。中國海澱（00256）自易手後，核心業務轉為鐘錶零售，鐘錶生意去年收入2.7億元，增長62%，當中溢利達7,224萬元，增長91%。集團擁有內地最大國產鐘錶品牌，包括羅西尼及依波，以零售額計分別佔內地市場第九及十位。
中國海澱本身炒味不濃，早前亦無大炒過，股價平穩，近期適逢內需股抬頭，價低有得諗，暫時睇0.9元，止蝕位放於0.62元。
古晨