雖然啲股仔經已連續第二個交易日有回吐，之但係大市仍未見失勢，恒指不但再次上揚，而且一升仲升逾700點，收報18,785點，資金明顯重投大價藍籌股身上，當中就以內銀股走勢最為耀眼，升幅由4%至8%不等。而尋日升得最多的藍籌股，就是中國鋁業（02600），全日升幅逾8%，收報8.44元。
至於內銀股尋日升得咁勁，到底關唔關獲花旗唱好事，實在無從考證。之但係，好明顯是，現時資金輪流炒，今次就炒番啲大價股，故相信短期之內，股仔都會稍為抖氣，大家亦係時候轉一轉貨喇。
講番市場消息，尋日市場有消息指，發改委及財政部表示，今年將補貼6億元人民幣加倍推廣高效照明產品，產品數目達1.2億隻，希望可以擴大消費需求，推動節能減排，同時亦促進企業發展，惠及城鄉居民。此外，據知內地汽車摩托車下鄉操作細則，以及船舶工業振興計劃亦都經已正式出台，所以不妨留意番啲相關概念股，睇吓仲有冇得發圍啦。
（小尾）