祖國魚缸最近屢創新高，趁住市場氣氛大好，中證監尋日正式公布新股發行制度改革的相關指導意見，仲要今日就開始實施，即是內地新股IPO已經毫無障礙，隨時可以推出。市場還傳出，中證監有意召開武林大會，邀請證券界高層齊集一堂交流對新發行制度的意見，做好準備迎接即將來臨的抽水潮。
一位內地證券界前輩同金占士講，早排見中央正式表態支持上海做國際金融中心，就已經知道新股發行好快都會重開，事關一個沒有融資功能的「半殘」交易平台，根本配合不了阿爺的政策方向，而且近幾個月魚缸水源充足，氣氛比舊年明顯好轉，相信新股發行現時重新開閘，都不致即時嚇殘個市。
IPO承銷料年袋20億
聽前輩講，其實中證監為保新股發行順利重開，一直都同業界保持密切交流，發行制度改革諮詢期內更加廣泛搜集大家意見，所以對於政策走向，業界一早已經心中有數。
今次召開武林大會，主要是由幾間大行講解新制度下的操作流程，等中小型券商準備充足一啲，以免抽資潮捲到時手忙腳亂。
其實開放新股發行對證券界收入大有助益，早前有人估計，淨計今年的IPO，業界都可以有20億承銷收入落袋，難怪大家態度如此正面啦。
金占士