人才係公司嘅重要資產，老細同下屬必須要好好溝通，工作至可以事半功倍。絲絲收到風，今個月二十五日滙豐就會搞個聚會，派出執行董事王冬勝同員工相聚一刻，互相交流，除此之外仲有遊戲玩、茶點食，等大家聯誼一下。
由王冬勝擔正做主角
上市公司一向都係股東大晒，金科玉律就係為股東創造最大利益，不過喺金融海嘯後，唔少人反思係咪要好好平衡社會、員工、股東等嘅利益，唔係一味為咗賺錢。所以好多機構都加入咗員工意見調查、員工滿意度之類嘅嘢。滙豐近年都有將員工嘅感受加入考慮，成為管理層可以得到幾多花紅嘅因素之一。
今次呢個名為「同王冬勝相聚一刻」嘅活動唔係第一年舉行，往年都有做過，大概都有80人出席，不過今次就改咗喺28樓舉行，相信閒閒哋可以坐番百幾二百人。活動會以廣東話進行，滙豐咁多老外員工，如果有興趣嘅話都可以另外報名再作安排。
彈性工作係員工訴求
好多時候呢類活動都會淪為吹水會，不過滙豐又真係有回應員工訴求，例如舊年佢哋嘅全球員工調查依家已經有結果，滙豐已宣布會實行彈性工作安排；五月同埋呢個月都做咗「客戶先鋒月」，分享提供優質客戶服務嘅方法。今年調查會由今個月三十日到下個月二十二日，有意見就要快啲提出喇。
余絲韻