周二港股大玩過山車，原來係為了部署周三的挾淡倉。大戶萬八點仲大玩震倉，分明唔挾上二萬唔心息，只要大市死唔去，我哋班鑊鏟友仲有大把世界。昨日大挾淡倉，資金轉炒大價股，形成過去幾日熱炒嘅股仔突然死火。其實股仔都炒咗好多日，加上今次炒風咁烈，花少少時間整固吓都健康啲，咁先可長炒長有嘛。
大市一挾就升成727點，惟部分股仔走勢依然唔錯，好似隻百營環球（00761）咁，剛停完牌配股，配股價低至0.205元，集資3,485萬元，雖然以大折讓配股，但過去兩日買盤完全可以消化晒啲沽壓，認真唔簡單，古晨記得每當配售完跌唔落嘅股份，通常都會大炒。
睇番資料，去年十一月百營以不多於8.54億元的總代價，收購印尼若干煤礦，變身煤炭股，今次集資規模濕濕碎，相信消化後隨時開車，現價有一定值博率，向上睇最少見0.35元，如果跌穿0.24元咪止蝕囉。
古晨