本文重點
俗語話「早起的鳥兒有蟲吃」，尋日世城系股東會有位攞唔到禮餅嘅小股東就當面向主席羅旭瑞投訴，話股價表現差，連餅都冇得食，顯得非常勞氣，羅生就一臉無奈。結果呢位小股東婆婆擾攘咗成分鐘，先由其他工作人員帶走。
先後開會分唔勻
其實婆婆攞唔到餅，並唔係世城預備不足，之不過世城系3間公司包括富豪酒店（00078）、百利保（00617）及世紀城市（00355）尋日先後舉行股東會，咁率先開咗股東會嘅小股東就攞咗餅先，晏啲嚟開股東會嘅股東就「冇餅分」。
對於部分股東嘅怨氣，世城系執董范統就幫老細打圓場，話喺金融海嘯影響下，大部分上市公司嘅股價一定會打折扣，但係公司會繼續做好本分，努力回饋股東咁話喎！至於嗰位婆婆聽講最後都獲派番盒餅，不過就唔知有冇按婆婆要求，派大盒啲嘅呢？
余絲韻