尋日港股反覆上落，不過成交仍達906億元，相信只要市場熱錢一日未撤離港股，落後股份仍續有炒作，不妨繼續留意大市成交額的發展。之不過，尋日內地股市走勢就似乎較為強勁，皆因上證指數最終以全日高位收市，升1.99%，收報2,778點。
內地股市表現得咁強勁，唔單只因為尋日有消息指，國務院已批准發改委等部門擬訂的汽車以及家電「以舊換新」實施方案，而且內地更有消息傳，國務院很快會公布重大政策，受惠板塊更多達十二個。不過，其實計我話，是否真的有新政策出台反而係其次，最重要係為股友們提供炒作藉口。
此外，尋日內地有報道指，原來上月北京土地成交出現了「井噴」現象，實際成交量更超過了前四個月的總和。據北京市土地整理儲備中心的數據統計，五月份京城共成交土地28宗，成交土地面積167.9萬平方米，規劃建築面積260.6萬平米。難怪近日內房股升極唔停，但多口都要一提，始終累積升幅已多呢！
（小尾）