質疑股價跌仲加薪

有一批有線寬頻嘅小股東，趁住股東會質疑公司一眾董事，點解公司嘅股價係咁跌，又唔派息，但董事嘅人工仲有得加？小股東又話，特首都要減薪，點解有線一眾董事唔減薪？此話一出，旋即引來在場其他股東拍掌支持。主席吳天海回應話，已經收到呢位小股東嘅意見，並會向有關人士反映，海哥仲強調，對所有股東嘅利益都係一致，無分大細咁話。講開又講，席上有啲有線嘅小股東同樣都係電盈（00008）嘅小股東，佢哋話已經加入咗電盈小股東大聯盟，仲會喺月底出席電盈股東大會，唔知佢哋到時會提出乜嘢問題？

睇嚟小股東真係叻咗好多，一啲都唔放過機會。成日話要幫小股東爭取權益嘅各方人士，真係大把機會表現身手。

余絲韻