呢期股市同樓市都一樣，喺資金氾濫之下，炒到飛起。股市成交突破1,000億元，最開心嘅除咗股民，當然係證券卜架。
有卜架報料話，呢排夠膽落場追貨嘅客戶，帳面利潤十分可觀，卜架嘅佣金收入增長亦唔錯，部分有自行跟進入市嘅卜架，呢期總係笑逐顏開，部分更已套利轉戰樓市。
多咗呢啲財富效應入場，難怪近期一、二手樓市都咁暢旺，唔少長期冇人睇嘅樓盤，一下子都被掃光。
係咁問又唔敢入貨
不過有人歡喜有人愁，呢位卜架又話，有部分客戶一直未敢跟隨入市，結果睇住個市係咁升，依家恒指升到萬八點樓上，佢哋嘅「冇貨恐懼症」就日益嚴重，成日來電問邊隻買得過，恒指落到乜嘢位可以上車，但至今都未有行動。若然短線恒指真係挾穿兩萬點，睇怕呢班客仲會更加心理不平衡！
余絲韻