本文重點
港交所（00388）尋日正式宣布，摩根大通中國區主席李小加將會加入港交所出任行政總裁，不過卻發生咗一段小插曲。話說一家外國通訊社擺咗一個大烏龍，竟然將李小加與港交所前主席李業廣掉轉咗，以為係李業廣回歸港交所。呢單新聞一出，大家都嚇咗一跳，好彩嗰間通訊社好快亦知道出錯，作出更正。
與李小加同叫Charles
點解會搞出個咁大嘅烏龍？估計可能係因為李小加洋名係Charles Li，而李業廣洋名亦係Charles Lee，兩個洋名都叫查理斯，所以就搞錯咗。
不過有口痕友就話，就算兩人洋名相同，但李小加出任港交所行政總裁呢單消息，大大話話已傳咗成半個月有多，好多人已知道，點解仲會當咗係李業廣？真係考起大家。況且李業廣○○至○六年係港交所主席，又點會無端端去做行政總裁？
李業廣依家係行政會議成員，人已退出港交所，都唔再掂手港交所事宜，就算港交所之前就延長董事禁止買賣期與商界有意見不同，一向與富豪稔熟嘅李業廣亦公開表示唔會作出評論。所以尋日呢單「李業廣回歸港交所」嘅消息，都算係匪夷所思！
余絲韻