昨日一開市一眾股仔已經大幅炒上，鑊鏟友真係忙個不停，因為市場太多獵物。港股連續兩日尾市大震倉，對股仔而言，昨日震倉明顯威力減弱好多，雖然最後一句鐘期指急插成400多點，不過市場水頭充足，好多股仔都唔多理大市，一於你有你跌，我有我升。
昨日古晨覺得隻中國礦業（00340）氣勢最勁，單日升14%，查實中礦○七年時係基金炒股，唔少基金仍坐咗唔少貨，半年結前炒番高個價亦合情合理。
古晨仲記得當年另一隻基金炒股就係隻中國七星購物（00245），佢喺內地有電視購物頻道，屬內需股之一，當年最高炒過上1.41元。近期佢走勢好怪，在現水平足足橫行咗成16日，直頭係基金收貨格局，情況同隻中礦一樣，呢啲股往往一旦發力，又係追到氣咳，一於趁低位買番少少博班基金炒佢，隨時會有驚喜，目標先睇0.2元，止蝕定0.1元。
古晨