本文重點
樓市成交愈來愈旺，自然有唔少人希望投身地產代理行業，Vincent留意到地產代理監管局按月公布的持牌代理人數略為上升，截至上個月底，個人牌照人數達22,832人，係今年新高。事實上，去年金融海嘯後，持牌代理人數由十月底的歷史新高23,533人，一直回落至今年二月先止跌回升，近幾個月一直徘徊在2.25萬人次水平橫行，到上月底才見有起色，多咗近250人入行。
美孚交投量增兩倍
講開物業代理，上個月代理生意熱爆，造就龍頭大行的美聯（01200）有123間分行嘅營業額超過100萬元，百萬分行數目之多，係○八年至今約莫一年半以來的單月新高，其中最好數嘅馬鞍山中心分行，由助理營業董事梁美愛帶領下，受惠銀湖‧天峰開盤，創出單月業績突破600萬元大關的佳績。
承接五月份旺勢，部分二手屋苑踏入六月份交投愈戰愈勇，好似上月全港屋苑成交量之冠嘅荔枝角美孚新邨，繼五月錄得過百宗成交後，今個月短短數天成交量已突破雙位數。美聯吳志輝同Vincent講，今個月頭三日，該屋苑已經有15宗成交，比上個月同期交投量多達2倍，樓價亦節節上升，好似7期萬事達廣場15號一中層面積877方呎C室，以348萬元賣出，呎價貼近4,000蚊。
（Vincent Lau）