內地3G的發展情況備受市場關注，皆因在三雄鼎立之下，競爭之激烈可想而知。尋日聯通（00762）就率先打破悶局，推出革命性的3G收費套餐，除取消了手機漫遊、手機長話費外，同時亦實行完全的單向收費，而用戶在外地接聽電話時亦同樣免費。
一出招，聯通昨日備受追捧，股價一度高見11.98元，而兩位行家中移（00941）及中電信（00728）則齊齊下跌。雖然俗語有云，有競爭先至有進步，但對投資者來說，邊個爭得贏先至係最重要，但一日未分出勝負，對投資者來說始終係一重不明朗因素。
講番大市，尋日港股有回吐，恒指最終跌近500點，不過大市成交金額就連續第二日錄得逾千億元，市場熱錢真係多到不得了。新能源發展振興規劃再度被市場提起，惟內容經已毫無新意，但隨着消息愈傳愈密，相信距離真正推出的日子應該不遠了，不過部分股份累積升幅就略嫌過大，追入風險頗高。
（小尾）