本文重點
恒生銀行（00011）喺金融海嘯之中逃過大難，無畀啲複雜難明嘅投資產品搞到頭都大，贏得口碑之餘，仲蟬聯「香港最佳本地銀行」，認真可喜可賀！呢個獎係由雜誌《亞洲貨幣》所頒，係根據銀行財務實力，又考慮埋領導才能、業務策略改變等因素而選出。以市值及溢利計，恒生係依家香港最大嘅本地註冊上市銀行。
避過金融危機獲表揚
話時話，恒生已經連續第二年拎呢個獎項，亦被表揚「儘管去年危險四伏，大都安然避過」。講明話係「大都」，即係佢其實都有中過招，大家仲記得恒生持有華盛頓互惠銀行債券，而且亦一直唔肯透露有幾多，當時消息一出搞到市場都恐慌性拋售恒生股份，不過今日恒生個股價都靚仔番，仲保住「紅底股」嘅地位。
其實恒生可以有咁好成績，某程度上都要多得退咗休嘅「柯大俠」──柯清輝嘅領導，依家恒生副董事長兼行政總裁梁高美懿都話，呢項殊榮係對恒生嘅實力同成個團隊不斷努力嘅認同。
余絲韻