本文重點
遠東控股（00036）董事總經理兼行政總裁邱達根係大忙人一名，為咗替公司物色投資項目經常飛嚟飛去，呢排豬流感（H1N1甲型流感）肆虐，以為登勤（邱之洋名）會飛少啲避一避啦，點知佢話冇有怕，仲啱啱先喺北京返嚟添！
登勤點解咁勇呢？因為佢覺得新型流感有藥醫，所以唔需要太擔心，北京出入境都唔算好嚴，唔似得香港咁緊張。咁又係嘅，香港經歷沙士一役，對於抗疫確係做得好足！登勤仲話早排啲醫藥股升得咁勁冇買到，認真呻笨！
趁升市沽唔少貨
講開個市，遠東控股都揸咗幾千萬貨，舊年因為個市跌，成個投資組合市值唔見一截。登勤尋日就同絲絲講，見呢排個市升得咁急，都沽咗唔少貨，但就唔肯透露賣咗乜嘢股份，淨係話之前坐嘅貨以藍籌為主，依家就得番一半係藍籌，明晒啦！
余絲韻