本文重點
絲絲尋日去咗王朝酒業（00828）嘅品酒聚會，試咗佢哋好多唔同種類嘅葡萄酒，亦向佢哋嘅主席白智生學咗唔少有關葡萄酒嘅知識同文化。白總對絲絲講，佢份人一向不煙不酒，但自從佢入咗王朝做之後就愛上咗葡萄酒，仲一飲就飲咗廿幾年，所以佢身體先咁好，早輪去做全身檢查個醫生都同佢講，以佢依家四十幾歲，佢副骨頭實在係Very good，事關佢啲骨嘅密度好高。醫生唔知原來白總已經五十幾歲，佢話呢啲全靠葡萄酒所賜，原來葡萄酒不但可軟化心血管同美容，仲可以強健骨骼添。絲絲都係第一次聽，咁啲女人就真係要飲多幾杯，預防骨質疏鬆啦。
同事入境戴口罩被查
今次白總佢哋嚟香港都好趕，三日兩夜馬不停蹄仲要見好多人，白總話佢上機前，同事特登畀咗佢7個口罩，話佢知呢排豬流感，香港人人都戴口罩。佢哋一行三人落到機，白總同公司總經理高峰見到唔係太多人戴口罩就無戴到，但呢位警覺性好高嘅同事，就戴上口罩過關，點不知無戴嘅人好順利過咗關，戴住口罩嘅同事就畀人「的」咗去驗體溫，真係「捉蟲」添。
余絲韻