本文重點
港交所（00388）新一屆上市委員會名單就快公布，由於今年有7名上市委員會委員夠6年任期要換出，加上因為早前延長董事禁止買賣期一役，上市委員會權力受質疑，要改組嘅聲音此起彼落，所以今次換莊，格外令人注目。
上市提名委員會係由6人擔任，港交所及證監會各佔一半。港交所方面，由3名董事夏佳理、史美倫及施德論負責；證監會方面，就由主席方正及兩名執行董事出任。
CEO上市委有份揀蟀
絲絲記得，挑選下任港交所行政總裁嘅遴選委員會，由5名港交所董事夏佳理、史美倫、李君豪、鄭慕智及陸恭蕙（已離任）組成，換言之，夏佳理同史美倫喺呢兩個咁重要職位嘅揀蟀上都有決定權。有中環友就話，夏佳理係港交所主席，自然喺好多方面有話事權，而史美倫喺兩個職位揀蟀上亦擔當重要角色，唔通佢都想做Kingmaker？難怪依家已有中環友「貼」史美倫可能係下一任港交所主席熱門人選。夏佳理○六年開始出任港交所主席，按最長6年任期計，佢仍有3年任期。
講開又講，今個月十八日係港交所上市9周年酒會，斷估會發邀請函畀李小加，嚟唔嚟就到時至知啦！
余絲韻