大市急升三日，恒指爆升成千九點，挾到班淡友屍骸遍地。大市連日急升，資金轉戰大價股，形成股仔上周十分淡靜，但炒到上萬九點，資金又炒番落後嘅股仔。
古晨昨日推介隻香港資源（02882），早段係威係勢，點知尾市玩急插，仲要跌回起步位，以走勢而言，認真麻麻，不過古晨卻覺得幾奇怪，尤其是尾市嘅沽盤，分明係專登追插要收1.68元，計一計隻股已經係第八日收於1.62至1.68元，古晨覺得似有「大茶飯」跟尾。
講番股仔，古晨幾鍾意隻玖源（00827）走勢，月初抽上0.18元後，足足整固咗成個月，近日開始再爆，昨日下午大市急回，仍見沽盤不多，尾市更抽回0.198元收市，走勢認真不俗。玖源主要於內地從事化肥生產及銷售，市值只得14億元，近日各龍頭股率先破位，資金轉炒落後，當然要追玖源，第一站先睇0.25元，止蝕位可放於0.18元。
古晨