本文重點
唔少投資者鍾情買賣車位，貪有租收之餘，仲可以短炒，好似會德豐地產（00049）去年拆售的紅磡碧麗花園車位，吸引到唔少炒家入市，聽聞主因係鄰近食肆對車位需求強勁。Vincent翻查土地註冊資料發現，碧麗花園今年暫已有26宗車位成交，其中12宗係舊年底向發展商買入然後再轉售，賺幅由唔夠5%到近10%都有。
該屋苑最新一宗轉讓成交在上月中錄得，原業主以36萬元賣出一個車位，成交價創屋苑車位新高，持貨唔夠半年賺3萬元，帳面賺9%；至於差唔多同時間拆售嘅同系九龍塘又一邨車位，就唔見有轉讓成交。
御龍山租金回報4厘
近排樓市轉旺，住宅租金亦升番唔少，個別入伙新盤嘅租金回報率更加直逼藍籌屋苑，有代理老友同Vincent講，沙田御龍山上月錄得逾20宗租務成交，回報率達到3至4厘，其中5座中層C室以每月1.3萬元租出，以業主去年460萬元嘅一手購入價計，租金回報3.4厘。
另外，紅磡海濱南岸嘅回報率亦升到4至4.5厘，屋苑6座高層F室，最近就以1.05萬元獲承租，回報率有成4.1厘。
（Vincent Lau）