證監廣告歌教投資
「問我基金價格幾多，問我孖展炒燶幾火羅……」啲歌詞係咪同你睇證監會廣告聽慣嗰首有啲唔同？因為呢個係未經任何人修改嘅創作人版本。證監會嘅《明智投資，學問為先》廣告得到咁多掌聲，我當然對幕後功臣好有興趣，個廣告係由廣告公司PBIL負責，跨媒體創作人Alan de Law嘅心血，佢喺投資路上都有一番經歷。
廣告人重填《問我》
Alan做咗廣告近20年，又會做廣告導演，唔少有音樂元素嘅電視廣告都出自佢手。「當聽到主題講問清楚先投資，我腦中即刻閃出《問我》。我都擔心政府部門較為傳統，係咪會接受舊曲新詞呢個Idea，但都決定大膽嘗試。真係要多謝證監會接納。」就係咁樣爭贏咗其他十多個廣告公司嘅對手。
我睇過Alan原本推介畀證監會嘅版本，無論歌詞同畫面都更精警、震撼，例如唱「無論佢有百般對」時，配上「八七股災」時聯交所主席李福兆拍枱鬧記者嘅新聞片段。「歌詞當然有被改過，但九成以上都係原本構思。我專登用番原著歌詞音韻，如『多』我刻意唔改，令觀眾再入腦啲。」
九七勁輸感同身受
製作一個廣告，Alan自然做足資料搜集，而佢投資亦曾經輸過。「我九七年都有『輸大鑊』，當時整體環境差，只要有股票、有物業、有生意嘅都受影響。只好離開廣告行業去做保險經紀，因為剩低嘅強項就係人脈關係，但我立志一定要做番創作人。」
Alan做保險經紀嘅兩年間不眠不休只顧工作，每日做200個Cold Call，依家左耳都聾聾哋。點解Alan有咁大動力捱過逆境？「做人目標要清晰，然後堅持同毅力都好重要。當每朝踏正八點有13間銀行打電話搵你追數，我估你個目標會比我更清晰。我有諗過自殺，但連死都唔驚，嗰一秒已經無嘢好驚。」
改填粵曲聲討迷債
用投資題材為舊曲填上新詞，唔係時代曲專利，小雅樂軒主席兼導師廖漢和嘅新作《海嘯餘生之迷債》，就借用粵曲《萬惡淫為首乞食》嘅曲調（「冷得我騰騰震……」嗰首）填上反映「迷債」苦主心聲嘅詞，本周六就會喺屯門大會堂首度公演。
苦主心聲反映現實
「有日我為《萬惡淫為首乞食》填新詞，咁啱睇見新聞講迷債苦主，靈機一觸用一晚時間完成歌詞，希望反映社會現實。」廖漢和話最能表達心聲嗰幾句係：「好心你哋積吓陰德，畀番啲錢我啦！做生意要均真，休要搵人笨。回番本金，等我借屍還魂。」
廖漢和喺六九年成立「小雅樂軒」，依家演唱者加樂團成員有成六十多人，由九一年開始定期搞「粵曲會知音」演出，已經搞咗二百幾場，仲有埋歌迷會。佢話受到老師廖志偉影響，特別鍾意創作「處境歌劇」，例如有講現代婆媳關係嘅《逼婆離家》，仲有同志題材嘅《妖姬奇遇結良緣》，夾埋有成300首作品。
緊貼事態繼續創作
廖師傳仲會留意「迷債」進展繼續創作，連「風水師爭產案」都已有劇本大綱。佢連作詩都鍾意寫時事，其中一首《迷你債券》就咁講：「債券誰人知甚麼，盲從落疊何其多。銀行層壓銷迷你，政府無能制妖魔。次按累埋終起禍，一生積蓄盡投河。白銀真金隨浪去，息即是空好事磨。」