怕轉軚入市即撞牆
回顧五月形勢，恒指升咗2,650點，升幅17.07%，表現最好嘅藍籌股分別係中信泰富（00267）、信和置業（00083）同新世界發展（00017），升幅介乎42%至56%，反而中電（00002）同港燈（00006）就分別跌0.48%同8.95%。公用股唔掂，唔通真係「熊移」（熊市遠去）？
依家唔少股友擔心港股慢慢發展成「倒U」走勢，最怕呢頭轉軚入市，嗰頭港股即跌倒撞牆。股友蘇先生話：「個市愈升愈唔敢買，都係自己後知後覺，恒指升到萬五點先信升市，升到萬七點時見有阻力自然唔敢追，點知依家見萬八。依家唔打算高追，我怕一入市就掉頭大跌。」
心存「例外」易中招
本港再次進入「零息時代」，今次《東方產經》網上民意調查問股友，銀行存款利息近乎零，在「零息時代」下你有何對策？截至上周末晚上6時，有16.9%人話會按兵不動，啲錢繼續放喺銀行，有11.7%人話會試搵更高息嘅存款計劃，但有71.4%人就計劃加大投資，例如買股票和物業等。
「五窮」無出現，我好怕畀人演繹為「例外」再現，呢種心態好恐怖。你仲記唔記得○七年恒指升見3萬點時，有人話恒指市盈率廿幾倍都未算高，恒指可升見4萬點，「中國因素」令港股今時唔同往日，恒指市盈率可以「例外」地超過20倍。之後嘅事，你知㗎喇。
全球經濟愈估愈縮
股市雖然會波動，但最終都要跟住經濟走。究竟環球經濟係咪真係復甦？「春芽」（green shoot）會唔會只係揠苗助長嘅假象？聯合國最新報告估計，全球經濟今年會收縮2.6%，呢個預測比今年一月時估計跌0.5%更差；但報告又話，如果金融市場及信貸有明顯改善，明年全球經濟可以增長2.3%。
我最近睇本新書《Animal Spirits》，由諾貝爾經濟學獎得主George A. Akerlof及曾經準確預測科網泡沫爆破嘅經濟學家Robert J. Shiller合著，書中話經濟理論失效係因為忽略5個「人的天性」，其中一個就係信心，無論幾多刺激措施都好，民眾無信心都係唔會有效。
見到美國《財富》雜誌有個美國MBA百大理想僱主調查，高盛由連續3年排第3位，今年跌到第4位，而早幾年經常喺頭25位嘅花旗、美林、美銀和雷曼，今年都跌出二十五大，係咪代表MBA對金融市場及經濟嘅信心未返嚟呢？
（大健）
若然有料想報畀大健或有嘢問，可電郵money.biz@opg.com.hk