至於本地魚缸亦唔輸蝕，恒指上周五報收18,171點，五月份單月上升17%。若以三月九日11,344點低位計算，兩個月多累升6,827點或60%，淡友可以話輸得一敗塗地。至於花旗魚缸上周五做好，道指報收8,500點，五月份升4%。相對亞太區及另一新興市場南美洲魚缸，歐美魚缸表現較為遜色，上個月升幅僅限於單位數。
提防魚缸熱錢流走
睇番呢兩個幾月，各地魚缸的表現，斷估專家無乜邊個夠薑睇淡六月，所謂「五窮六絕」的講法，古勝早講過已不合時宜。不過，呢次魚缸升浪，純粹由資金湧入帶動，若以實質經濟層面而論，又或企業盈利表現睇，在下認為各地魚缸在現水平屬偏高。從技術走勢分析，恒指確有機會在六月挑戰20,000點大關，但要記住一旦熱錢流走，魚缸回調速度將極快，古勝建議看官呢個月炒股，宜短不宜長，走得快，好世界！
上周五恒指升至最高18,228點，又有唔少指數熊仔被殺，目前較多街貨的恒指熊仔，集結在18,300至18,500點水平，睇情況呢個星期，在此區域的恒指熊仔，最終難逃被殺命運。其實自恒指升穿16,500點水平後，願意留在「牛熊牧場」的缸邊友買少見少，上周五牛熊證的成交金額只有64.92億元，僅佔魚缸成交額的7.04%，跟過往動輒十幾廿億元的成交額比較，古勝只能嘆句好多「牛熊牧人」已壯烈犧牲。
大笨象（00005）上周五在花旗掛牌的ADR價格重越70元，折合報收70.48港元，連同另一大隻佬祖國移動（00941），ADR升0.59元，恒指今日料再可升逾200點。其實重磅大隻佬差不多已升得就升，若要選較落後者，非祖國野獸（02628）同平保（02318）莫屬。由於祖國野獸在30元水平，蟹貨重重；而平保貴買富通亦失人心，兩股落後有其道理。不過古勝相信，一旦魚缸要再推高，好友最終都會搵佢兩個幫手，在下較睇好野獸，能在28元水平樓下入貨最好。
祖國魚缸再檢討IPO重啟，但何時重啟？阿爺暫未有明確時間表，缸湖傳聞係六月或七月機會較大。為咗阻止祖國魚缸不理性地瘋狂插水，北大人三番四次出手相救，至今年祖國股市較去年明顯轉旺。深滬兩魚缸總日均成交額達1,815億元（人民幣‧下同），較去年日均成交額則只有1,084億元大幅增長。
光證規模有利搶灘
其實祖國魚缸IPO重啟，能參與融資的證券公司當然直接受惠。不過，本港上市證券公司較集中本港證券業務，古勝認為能夠受惠的證券公司數埋唔夠十隻手指。古勝之前提過大光燈（00165）持有39.31%（截至去年年底計）光大證券，大光燈呢個直接持股量，可以話着數過晒本地魚缸其他證券股。光大證券在兩地魚缸有番咁上下分量，在祖國規模排前十名，其收入主要來自經紀業務。祖國魚缸IPO重啟後，長遠有利推動祖國證券業的發展，對從事祖國經紀業務的光大證券十分有利，屆時大光燈亦水漲船高。
古勝