本文重點
近月有輪商出新招搶客，又有輪商向同行挖角，最新有傳聞話高盛前執行董事、有「輪后」之稱嘅李頌慈（Cheril）快將復出，仲會加盟巴克萊銀行。不過睇怕都係謠傳居多，因為巴克萊本月先請咗個新代言人黃紹良。
加盟巴克萊唔多似
據知Cheril自去年十一月向高盛請辭後，一直都有與舊行家保持聯絡，仲不斷有人想斟佢復出，難怪出現呢個傳聞，可惜未搵到當事人證實真偽。但係巴克萊最近先請咗新代言人，問新上場嘅巴克萊亞太區股票衍生工具推廣主管黃紹良，佢都話無聽過有關傳聞。
牛熊證市場鬥到你死我活，據講第12間牛熊證發行商已經進場，但爆冷係中銀國際，好多行內人都感意外。一直盛傳瑞信及美林將會推出牛熊證，但竟然中銀國際跑出，本周四已向港交所（00388）入紙推出一隻滙控（00005）牛證，收回價59蚊，下周五上市。
余絲韻