本文重點
絲絲早排同一位內地銀行界朋友飯聚，提起金融海嘯後內地銀行業嘅情況，老友話內地銀行業受影響唔算大，至於會否把握機會到歐美市場「執平貨」？老友話早前一個內地研討會上，中銀監主席劉明康亦被人問到同樣嘅問題，劉主席文縐縐講咗兩句「外面的世界很精彩，外面的世界很無奈」，咦，呢句嘢點解咁耳熟嘅？
引用歌詞真浪漫
原來呢兩句係寶島歌星齊秦所作歌曲《外面的世界》嘅歌詞，絲絲依稀記得首歌係齊秦寫畀佢當年女友王祖賢，當時絲絲仲細，但好記得首歌嘅旋律同歌詞，絲絲好驚嘆咁同老友講，估唔到劉明康除咗係一位出色嘅銀行家，仲係一位好浪漫嘅男士。
劉主席形容得真係好貼切，其實嗰兩句歌詞嘅長版係「當你覺得外面的世界很精彩，我會在這裡衷心的祝福你，當你覺得外面的世界很無奈，我會在這裏耐心的等着你……」唔知道若果啲銀行真係去到海外投資嘅話，劉主席會唔會好似首歌裏面位男主角咁諗呢？
余絲韻