本文重點
曾開創「一蚊雞」成名嘅稻香（00573）老闆鍾偉平，除咗做生意叻之外，仲幫手宣傳本地嘅飲食文化，絲絲知道佢開咗間「飲食文化博物館」，裏面介紹飲食文化，好似大牌檔同以前中式酒樓嘅布置，今、明兩日仲免費開放畀公眾。
介紹各地飲食文化
絲絲聽稻香嘅ＣＥＯ梁耀進講，呢間位於火炭嘅「稻香飲食文化博物館」原址喺粉嶺，舊年就搬咗去火炭，面積有成五千方呎。
佢話希望透過呢間博物館，令港人了解各地嘅飲食文化，館內有五個飲食文化主題，包括稻米、香料及世界奇趣區等，仲有飲食用具、茶葉等展品，其中更有滿漢全席時所用嘅珍貴餐具。
館內當然唔少得介紹稻香嘅發展史同企業文化，所以話做生意都要懂得宣傳，其中一個方法就係好似鍾老闆咁，開間博物館，等多啲人認識稻香，提升品牌知名度。
余絲韻