本文重點
兩岸直航安排愈來愈緊密，絲絲一直都覺得奇怪，以上海為基地嘅東航（00670）遲遲未喺台灣成立分支機構，而尋日東航終於可與南航（01055）及國航（00753）睇齊，喺台北設立分部，集團董事長劉紹勇亦有到分部新址打氣。
東航仲向台灣公益團體「台灣愛鄰社區服務協會」贈送100張來往台北、上海嘅機票，可讓100位小朋友參加二○一○年上海世博會。
去年初兩岸直航班次愈來愈多，由去年○八年七月至今年五月中，東航已有700幾班直航包機，兩岸旅客達12萬人次。
內地力谷優惠機票
講開送機票，東航雖然正處財困，但不忘提供各種優惠機票。東航江蘇公司近日針對內地中學生團體以及合家歡外遊，推出機票優惠，優惠內容包羅萬有，好似內地學校組織交流團除咗享有團體優惠，仲有買十送一等。
絲絲覺得，依家航空業嘅需求比以前少咗好多，東航搞多啲優惠可維持一定客座率，但長遠嚟講，要賺錢可能有難度，管理層似乎要再諗多啲計仔。
余絲韻