本文重點
去年初微軟曾計劃收購雅虎，呢單刁最終都係做唔成，事隔一年，微軟似乎有意舊事重提。絲絲尋日睇到內地有媒體話得到可靠消息，微軟行政總裁保曼前幾日去杭州秘密造訪阿里巴巴（01688）主席馬雲，談話內容神秘，但消息人士話，保曼可能與馬雲談及洽購雅虎計劃。
隨時變「拍乸」先打招呼
絲絲睇得出，呢次造訪相當有誠意，除咗行政總裁保曼外，同行仲有其他微軟高層，包括大中華區董事長兼首席執行官梁念堅、亞洲研究院院長張亞勤等，畀足面馬雲。
咁大陣仗，難免惹來外界憧憬。微軟對於收購雅虎呢單刁一直念念不忘，早前保曼曾接受媒體訪問，講明已為新一輪收購雅虎嘅談判作好準備，而中國雅虎係雅虎全球布局嘅重點，並由阿里巴巴揸Fit，若收購落實，微軟與阿里巴巴就變成「拍乸」，所以兩大巨頭先碰吓面，係最自然不過之事。
尋日中午，微軟中國與杭州市政府簽署3年嘅戰略合作備忘錄，其中一項係於杭州成立首個計算中心，保曼仲親臨助陣，可能地點與阿里巴巴公司相近，所以順路與馬雲打招呼都唔出奇。至於雙方係咪真有合作，大家就要拭目以待。
余絲韻