本文重點
國壽（02628）前發言人劉廷安被派到香港就嚟一年，佢尋日首次以國壽（海外）公司總裁嘅身份開記者會，絲絲梗係要去捧場。
劉總笑稱，董事長楊超舊年派佢落嚟時，要求佢半年之內學好廣東話，否則就調佢返北京，聽到絲絲哈哈大笑。
劉總嘅廣東話造詣去到邊，就唔使太深究喇，因為楊董都係講吓笑啫。不過佢都明白楊董嘅弦外之音，係希望佢帶領國壽融入香港社會，做好本分。
國壽唔會做「飛鴿牌」
劉總話佢哋唔會做「飛鴿牌」（即係過客），市道好時就嚟淘金，唔好就一飛了之。所以，佢哋除咗唔減薪、唔裁員之外，依家又趁25周年慶，推出好多回饋客戶嘅優惠，例如向購買指定壽險產品嘅客戶，贈送豬流感（H1N1甲型流感）附加險。
與國壽海外一樣係25歲，或者出生日期一樣嘅幸運兒，更有機會參加觀看國壽代言人姚明出賽嘅美國NBA之旅添。絲絲今年啱啱好25歲，都好心動吖！
余絲韻