本文重點
滙控（00005）批出1.53億認股權畀員工，依家公司股價咁勁，個個賺到笑，唔講你唔知，今年參加滙控股份儲蓄計劃嘅員工數目，同埋發股數量都創歷史新高，絲絲記得滙控畀人質到落三十幾蚊嗰時，好多股東嚇到腳軟，睇嚟滙控同事一啲都冇畀當時不斷下瀉嘅股價嚇親。
5年期儲蓄賺12.7萬
絲絲睇番啲資料，滙控今次授出咁大批認股權，數量比上年多咗超過4倍，雖然參與計劃嘅員工增長幅度無咁大，不過兩個數字都係歷史新高，亦反映平均每人認購數量直線飆升。
最大嗰份計劃就係5年期股份儲蓄，即係亞太區行政總裁霍嘉治都有參與嗰份，總共認購4,529股，同其他同事一樣，每個月最多供250英鎊（約2,921港元），以尋日股價65.9元，5年後用呢個價計，霍大班已經有12.7萬元袋袋平安，相信一眾員工真係「認得愈多，笑得愈多」。
今次滙控批認股權，一眾董事只有霍嘉治一個參加，絲絲心諗，以滙控管理層一向畀人「扎根滙控」嘅印象，無理由得一個董事做「大好友」。
絲絲覺得或者係佢哋早幾年參加咗，今次未有取消舊計劃轉去新計劃，但係前幾年嘅認購證行使價都過百蚊，咁要有錢賺咪即係滙控要變番「紅底股」？照咁睇其他董事們隨時仲「好友」過霍大班！
余絲韻