建行（00939）尋日限售股解禁，美銀雖然就好似冇乜行動，但係市場仍然傳出美銀或會以折讓12%的價格批售手頭上建行的股份，不過同時間，亦有消息指中投有意全數接貨。消息真係傳個不停，不過都係嗰句啦，消息仍未得到證實，之但係建行尋日股就仍然大幅做好，全日升5.05%，收報4.99元。
講番大市，尋日港股挾淡倉活動仍然繼續，全日被強制回收的恒指熊證有46隻，恒指最終收報17,217點，即係話距離17,400點只有183點。
咁到底下個大目標價係17,400點、17,500點抑或18,000點呢？小尾唔知，但尋晚篤吓篤吓，發覺依家市場上收回價係17,400點同17,500點的熊證就仲有13隻，講緊的街貨份數就約400億份。之所以區區百零二百點，有心人要挾埋都好理所當然，因此仲堅守緊防線的熊仔熊女，就要屈吓同伸吓啦（即係能屈能伸呀）。
（小尾）