前晚美國私人機構ADP公布嘅四月份就業職位減少唔夠50萬，比預期減少60幾萬好，當然，一個月減少50萬個職位絕對唔係好嘢，但投資者認為好正，根本係同投資者嘅預期心理有好大關係。
炒匯一定要跟勢，當然亦有人精於短炒，每次幾十點就食胡，就算有十幾點都執，結果一日埋單計，100點嘅波幅隨時賺200點。各位問吓自己輸錢係咩原因，最常見嘅係有胡唔食。我識得個短炒高手，每次入市最多係1.5手，佢同我講，到依家為止，未夠一個月，帳面已經賺緊4萬幾銀，你問吓依家有幾多人月入有4皮？所以我建議，月入仲係幾千蚊嘅後生仔女不妨了解吓匯市嘅運作，試吓炒匯，但首要原則係戒貪，然後先係執行止蝕，因為好多時都係因為唔食，先至會變成要止蝕。
尋日市場等緊英國同歐洲央行公布議息結果，英鎊同歐元回番啲，但個勢仲係好強，我見隻鎊跌穿1.51之後又上番去，所以喺1.5112揸咗一手。
蘇小妹