本地魚缸繼續「牛」氣沖天，恒指早段衝上17,328點後見回吐，一度失守萬七點關，低見16,880點，與「錢」對着幹嘅死硬派淡友，以為可以反攻，誰知再次滑鐵盧，午後恒指回勇，收報17,217點，升383點，大市成交增至952億元，乃去年九月以來最大單日成交額。
再闖關靠祖國移動
大笨象（00005）成今次升市大功臣，高位見65.2元，收報65.05元，升5.6%，成交達57億元，估計本地魚缸若要直闖萬八點關，主角會落喺祖國移動（00941）身上。
除咗港股之外，亞太區魚缸亦普遍做好，日本魚缸升4.5%，獅城魚缸再升2.5%，祖國魚缸大漲小回。時屆「五窮」，金魚缸竟出現咁全面、咁大型嘅升勢，確實令人意外，亦顯示呢股購買力實在不容低估。問題係，呢架順風車經已行咗一大條直路，鑊鏟友要有心理準備，隨時會轉入九曲十三彎，即係話喺高位大幅波動，最終落車出口喺天定喺地，就要睇閣下嘅修行。
全球經濟已逐步走出谷底，料航運業亦可跟隨復甦，而波羅的海指數近日持續上升，更令市場相信航運業最壞時期已過，下半年可望回穩，所以航運股近日明顯有追捧，而中遠太平洋（01199）亦拾級而上。
中遠洋與其他航運股一樣，首季業績依然錄得負增長，截至三月底止第一季錄得盈利4,339萬美元，比起舊年同期倒退34%，期內碼頭處理總吞吐量較同期下跌8%至957萬標準箱；而中國碼頭集裝箱總吞吐量同比下跌6.6%至869.26萬標準箱，至於散雜貨總吞吐量為256萬噸，按年跌2.8%。去年第四季全球經濟急轉直下，令到外貿持續萎縮，中遠洋當然難免會受波及，第一季盈利下跌實屬預期之內。
盈利勢將回復增長
現時中遠洋涉及業務廣泛，當中包括港口、集裝箱租賃、集裝箱製造同埋物流業務，去年公司盈利減少主要因為集裝箱製造業務盈利顯著減少，其他業務表現相當平穩，而由○七年開始，集團已致力改善收入組合，其中集裝箱製造比重顯著減少，相信可以令公司未來盈利表現更加穩定。
隨着環球經濟逐步走出谷底，估計中遠洋最艱難嘅日子已經過去，只要全球經濟回穩，相信盈利唔難回復增長，而多間大行喺公司公布首季業績後，都有發表吹水報告唱好佢，其中「小魔怪」維持「增持」評級，認為季度業績符合預期。目前市場資金充裕，料中遠洋呢類具復甦概念嘅股份，不乏捧場客，尋日大成交上揚，只要能夠衝破四月中旬高位9.18元，相信唔難挑戰10元大關。
古勝