本文重點
沙田御龍山陸續收鎖匙入伙，喺有樓睇嘅情況下，屋苑隨即錄得首宗租務成交。利嘉閣石家麟同Vincent講，御龍山啱啱租出嘅單位係3座低層C室，面積888方呎，每月租金1.98萬元，呎租22.3元。
Vincent八到，區內另一個指標屋苑駿景園嘅成交呎租大約要16元，可見御龍山嘅租金做價都算幾理想，屋苑現時約有75個租務放盤，平均每方呎叫租約23元。
居屋買賣9個月最多
至於御龍山嘅買賣交投都快咗，近兩個月屋苑已經錄得超過30宗二手成交，今個月就暫時錄到6宗，即係差唔多平均一日就有一宗買賣成交，而蝕讓幅度就由之前嘅15%至20%，收窄到近排不足10%。
前排樓市小陽春，不但私人住宅買賣成交反彈，連帶二手居屋交投都顯著增加。Vincent聽利嘉閣周滿傑講，原來上個月市場有660宗二手居屋買賣登記，對比三月份升咗26%，係近9個月最多，而平均每宗成交金額亦升到135.4萬元，創近半年新高。
周滿傑話，最熱捧嘅10個居屋當中，上月佔8個按月交投量錄得升幅，至於一向係新界居屋樓王嘅火炭穗禾苑，無論登記量同按月升幅都好突出，該屋苑上月錄到30宗買賣登記，較三月份急升114%。居屋表現咁好，相信係農曆新年後市況回升，同埋最近銀行又削減按揭息率，令到買家入市信心增加。
（Vincent Lau）