長假期又到，絲絲已經計劃好點樣度過，但喺證券行做嘅老友就好唔得閒，仲話要返工，乜唔係休市咩？喺大福證券做嘅老友話，公司旗下嘅沙田連城分行決定喺五月一日至三日照常營業，目的為咗吸納一批內地客，到時仲有識講普通話嘅員工坐鎮，介紹港股同金融產品。
絲絲記得大福喺上水都有分行，點解反而係沙田分行照常營業？於是絲絲打電話問吓沙田連城分行經理曾劍波，佢話因為上水分行喺商業大廈入面，星期日唔營業。
提到有行家部署五‧一期間搶灘吸客，上水天行證券行經理鄧禮梅就話，依家全世界都吼住中國市場，不過好多人又話港股仲係熊市三期，咁點叫內地客買港股呀？
講番大福，原來佢哋除咗吸大陸客外，亦向日本同韓國客埋手。大福證券發言人透露，見到日本客人都有興趣投資港股，大福就特別成立個部門專責照顧佢哋，仲請埋個日文系畢業嘅學生幫手做翻譯，網站資訊都有埋日文版本啦。另外，佢哋都拍咗韓語Video介紹吓大福，方便第日有韓國客人參觀證券行時，可增加多啲親切感。
余絲韻