本文重點
銀行界重量級人物相繼過檔地產界，莫非暗示撈地產點都好過做處於「運滯期」嘅銀行業？消息指恒生銀行（00011）執行董事兼財務主管陳國威將過檔新鴻基地產（00016），絲絲打畀新地求證，佢哋不置可否，仲話公司一向都唔會評論高層變動傳聞。
轉環境同梁太無關
大家聽到喺恒生做咗14年嘅陳國威要走，會唔會好詫異？會唔會以為佢係想同將於下月初退休嘅「柯大俠」（柯清輝）共同進退？
多心啲嘅，又會唔會懷疑同即將接替柯大俠，上任恒生副董事長兼行政總裁嘅梁太（梁高美懿）有關？
絲絲收到風，以上嘅所有疑問都係唔成立，皆因陳國威萌生退意喺早於柯大俠宣布收山，同新地密斟已一段好長時間，消息仲話佢做咗銀行廿幾年，想轉吓環境發展，所以選擇咗新地，認為一切同梁太即將上任係毫無關係。
做開財務嘅銀行家真係唔使愁，家陣個個都為金融海嘯搞出嘅後遺症執手尾，好似做開銀行財務總監嘅尹燄強早排都轉投房地產公司，依家仲多埋陳國威，地產界就人材濟濟，銀行界要填番呢批精英個位都幾愁㗎！
余絲韻