本文重點
豬流感爆發，並且有全球擴散迹象，搞到人心惶惶，擔心係○三年沙士翻版。偏偏喺呢個時候，港交所（00388）行政總裁周文耀就剛出發去美國推介港股市場，今次佢係應大和證券邀請，到美國東、西兩岸包括三藩市、紐約及波士頓推介香港市場，佢剛啱喺前日（周日）出發，預計要本周六至返回香港。
大家都知今次豬流感爆發源頭喺墨西哥，而美國又同墨西哥幾咁近，即係好似香港同大陸咁。絲絲希望周文耀今次去美國推介香港之時，記得要做足防疫措施，出街戴口罩。事實上，大家經歷過沙士一役，都唔敢掉以輕心。其實喺前日豬流感爆發消息已開始不斷升溫，周文耀仍然無懼如期出發，真係盡責，為香港仆心仆命。換轉係時下年輕人，可能已經即時擰頭。
滙恒防疫保障員工
大和每年都會喺日本、美國等地做Roadshow，安排公司與當地投資者見面，每年都會邀請港交所一起參與。想唔到今次推介日期及地點撞啱新疫症爆發，絲絲都係嗰句，希望各人快啲平安返嚟。
講開預防措施，全球有超過30萬名員工嘅滙豐向員工發電郵，話集團已做咗預防措施保障員工及家人，包括提供個人衞生建議、讓懷孕員工回家，一旦員工有流感徵狀更會提供醫療服務，呢啲咁關切嘅安排，當然亦包括埋恒生銀行（00011）。
余絲韻