受到豬流感疫情的影響，港股未能承接上周五美股升勢，尋日恒指一度低見14,798點，收市報14,840點，跌418點。雖然即月期指高水154點，但下月期指卻低水39點。今次跌市，會唔會等期指結算過後才見真章，就要拭目以待。
昨日大部分股類都難逃一跌，唯獨醫藥股幾乎全線做好，相信經歷過沙士嘅香港股民，都明白呢個道理。不過，昨見大部分醫藥股都裂口高開，夠唔夠膽落場追貨，就是另一回事。
由於短期市況會較為波動，故傾向選擇一些較穩陣的股份作配搭。今日組合股膽選浙江滬杭甬（00576），事關公路股業務收益較為穩定，至於旗下證券業務，雖然A股已累積一定升幅，高位回吐壓力增加，但反過來想，萬一真的出現豬流感疫情席捲全球，A股在中央政府加大力度「維穩」之下，衰極都有個譜，故相信其整體業務可維持穩定發展。
滬杭甬昨逆市上升，收報5.97元，升1.5%，短線只要守穩50日線5.5元樓上，後市仍有機會向6.3至6.5元水平推進。
再拖中鐵建（01186）作腳，皆因中央的救市資金陸續到位，大型基建工程陸續展開，中鐵建在業內手執牛耳，是「保八」政策下的受益者。近三個月，中鐵建股價一直在嘗試突破11元阻力位，站在炒上落的角度，在10元邊可以諗諗小注跟進，升上11.5元沽貨，穿9.2元止蝕。
另一腳搭中石油（00857），股價在6.5至6.6元現承接，守於其上，仍有機會一試7元阻力位。
帥哥